في عز الزحمة وأنا في طريق عودتي لبيتنا وأنا في الميكروباص وتحديدا تحت كوبري الدقي وفي اتجاه الجيزة حصل قدامي هذا المشهد الدرامي:
الميكروباص بيتحرك ببطء والدنيا زحمة وسط الكلاكسات ودوشة الزحام كان فيه كام واحد واقفين حوالين تاكسي واقف على بعد أمتار مننا في نص الشارع الصورة مش واضحة لكن كل الواضح ان الناس كلها منتبهة مع اللي بيحصل عند التاكسي!
كل الناس اللي في محيط المكان مركزين وباصين تماما عاللي بيحصل وفجأة كسر الانتباه صوت صويت! اه صويت فجأة الناس اللي واقفين يتفرجوا جريوا كلهم باتجاه مصدر الصوت اللي هو التاكسي وابتدت الناس تتجمهر حوالين التاكسي في نفس الوقت الطريق بدأ يتحرك شوية والميكروباص بدأ يقرب من التاكسي والأحداث
فجأة ظهرت واحدة اللي هي مصدر الصويت الناس منزلنها من التاكسي وبيحاولوا يهدوها، من كل ده ومش بيان في ايه في وسط المعمة ظهر واحد عمال يزعق في الست ديه وغالبا كان جوزها لأن محدش كان بيقربله أو بيحاول يمسكه وفجأة ضرب الست ووقعها عالأرض وقوموها والناس كترت والميكروباص بقى جنب الاحداث تماما وابتدى يعديهم، المهم الراجل خرج من وسط الناس في ايده عيل بتاع شهرين تلاتة وبيجري باتجاه الناحية التانية من الشارع! اه والله بيجري بالعيل!!
للاسف الميكروباص كان اتحرك بعيد ومعرفش ايه اللي حصل، بس في الغالب ان الست كانت متخانقة مع جوزها وراكبة التاكسي ومن حظها الدكر جوزها حصلها ونزلها من التاكسي ضربها واخد منها العيل وجري بيه!
المشهد ده استمر تقريبا 30 أو 40 ثانية! شوفته قبل كدة في أفلام كتير لكن عمري ما تخيلت اني اشوفه لايف!
للأسف
شوفت واحدة بتضرب
شوفت رضيع بيتخطف من حضن أمه
شوفت ناس ملمومة كل اللي عملوه الفرجة